Usa ka talagsaon nga obra sa disenyo ang Zip-Fastener Ship nga gihimo sa Japanese artist ug designer nga si Yasuhiro Suzuki, nga nakahatag og bag-ong pamaagi sa pagtan-aw sa mga sakayan sa tubig.
Ang maong barko nga morag zipper ang porma, gihimo human sa iyang obserbasyon samtang naglupad siya sakay sa eroplano ug nakita niya nga ang agianan sa tubig sa mga sakayan murag “zipper” nga nag abli sa tubig.
Sa paglabay sa panahon, iyang gihimo nga tinuod nga naglihok nga sakayan ang maong ideya. Kung molihok ang Zip-Fastener Ship, ang tubig nga iyang ginaagian moporma og linya nga morag ngipon sa zipper, hinungdan nga murag gi-unzip ang tubig samtang kini molayag.
Kini nga ilusyon naghatag og kahibulongan nga epekto sa mga makakita, nga murag ang tubig mismo gi-ablihan sa pag-agi sa barko.
Ang proyekto nagpakita kung giunsa ang arte ug inobasyon mahimong maghiusa aron makahatag og bag-ong panan-aw sa ordinaryong butang sama sa sakayan.
Photo Courtesy: Yanko Design
