Gikumpirma sa Department of Trade and Industry (DTI) nga gilaumang adunay ipatuman nga pagsaka sa presyo sa pipila ka piniling brand sa delatang sardinas sa nasod.
Sumala sa opisyal nga pamahayag sa maong buhatan, ang maong kausaban gikinahanglan tungod sa padayong pagsaka sa operational ug logistics costs nga giatubang sa mga tiggama (manufacturers), partikular na ang gasto sa fuel ug packaging nga gikinahanglan sa produksyon. Hinuon, giklaro sa ahensya nga dili tanang brand ang maapektuhan niini ug nagpabiling kontrolado ang ipatumang umento.
Sa pikas bahin, gipasalig sa DTI ngadto sa publiko nga magpabilin ang kasamtangang presyo sa uban pang nag-unang palitonon. Walay narekord nga paglihok sa presyo sama sa Tinapay (Bread), De-latang karne (Canned meat), Instant noodles, Ug uban pang batakang palitonon
Gipahayag sa pamunuan sa DTI nga dako nga bahin sa mga batakang produkto o Basic Necessities and Prime Commodities (BNPCs) ang nagpabiling stable human sa malampusong pakig-alayon sa gobyerno ngadto sa mga dagkong magpapatigayon aron maprotektahan ang kaayohan sa mga konsumidor.
Padayon karon ang gihimong monitoring ug evaluation sa DTI sa mga kamerkadohan aron masiguro nga ang pagpatuman sa bag-ong presyo nahiuyon sa gitakdang regulasyon ug malikayan ang dinalidali o dili awtorisadong pagpataas sa presyo sa mga baligya.
Photo Courtesy: Pilipino Mirror
