Balhog sa prisohan ang usa ka High Value Individual nga giilang si alyas “Jojo” 41-anyos ugresidente sa Brgy. Tinag-an, Albuera, Leyte human kini madakpan sa kapulisan sa Albuera Municipal Police Station sa gilusas nga anti-illegal drug operation nga gilusad didto sa Brgy. Tinag-an, Albuera, Leyte niadtong nakalabay nga adlaw.
Atol sa operasyon, malampusong nakapalit ang poseur-buyer og usa ka sachet sa gidudahang shabu nga nagkantidad og Php20,000.00. Human niini, gihimo ang pag inspeksyon diin nasakpan ang daghang sachet sa gituohang shabu nga adunay kinatibuk-ang gibug-aton nga 56.8 gramos ug gibanabana nga kantidad nga Php386,240.00 sumala sa Dangerous Drugs Board (DDB). Nasakmit usab ang usa ka sachet sa gidudahang uga nga marijuana nga adunay gibug-aton nga 7.40 gramosug gibanabana nga kantidad nga Php888.00.
Lakip usab sa mga nakumpiska mao ang usa ka kalibre .45 nga pusil nga adunay mga bala, minarkahang buy-bust money, ug uban pang drug paraphernalia.
Ang pagmarka, paglista ug pagkuha og litrato sa mga nakumpiskang ebidensya gihimo mismo sa lugar sa operasyon atubangan sa mga gikinahanglang saksi subay sa mga probisyon sa Republic Act No. 9165.
Ang tanang nakumpiskang ebidensya gidala ngadto sa Ormoc City Forensic Unit, alang sa laboratory examination. Gipahibalo usab ang suspek sa hinungdan sa iyang pagdakop ug sa iyang mga katungod ubos sa Konstitusyon sa pinulongang iyang nasabtan.
Sa pagkakaron, nagpabilin siya ubos sa kustodiya sa kapulisan alang sa dokumentasyon ug hustong disposisyon sa kaso.
Photo Courtesy:Albuera MPS
