Usa ka talagsaon nga panghitabo sa Yonsei University sa South Korea human opisyal nga gidawat isip honorary student ang usa ka guide dog nga ginganlang si Noon Song.
Si Noon Song, nga dos anyos pa lamang, maoy nagtabang sa estudyante nga si Lee Ye-won, usa ka senior psychology student, sukad niadtong Marso. Tungod sa dakong papel niini sa adlaw-adlaw nga kinabuhi sa iyang tag-iya, gitagaan kini sa unibersidad og student identification card ug giila isip opisyal nga miyembro sa kampus.
Matud pa ni Propesor Cho Chang-hoan, gikan karon, opisyal nang estudyante sa Yonsei University si Noon Song ug pagatrataron sama sa ubang estudyante sulod sa eskwelahan.
Gihimo sa unibersidad ang maong seremonya aron mapalambo ang kahibalo sa publiko mahitungod sa katungod sa mga tawo nga Person With Disability o PWD, ug sa importansya sa mga guide dog sa ilang adlaw-adlaw nga pagkinabuhi.
Nadani usab ang daghang estudyante ug netizens sa maong lakang sa unibersidad, diin daghan ang mipasidungog sa papel sa mga guide dog nga dili lamang kauban apan mahinungdanong tabang sa mga adunay espesyal nga panginahanglan.
