Nakit-an ang usa ka talagsaon nga klase sa Rafflesia, nga giila nga usa sa pinakadakong bulak sa kalibotan, sulod sa protected area sa AlaBuyCarPanSip Watershed Forest Reserve sa Barangay Lobo sa maong lungsod.
Gikumpirma sa Department of Environment and Natural Resources (DENR)-CENRO Cantilan ang pagkadiskubre human sa ilang field verification ug habitat assessment nga gihimo niadtong Mayo 20, 2026.
Matud pa ni CENR Officer Gay P. Reullar, unang namatikdan ang maong bulak sa mga personnel sa Enhanced National Greening Program (ENGP) ug Park Protection Officers atol sa ilang field validation activity niadtong Mayo 19.
Human niini, dali nga nagpadala og team ang DENR aron susihon ang maong tanom ug tan-awon usab ang kahimtang sa iyang pinuy-anan.
Nasuta nga ang Rafflesia nakit-an sa kabukiran nga adunay gitas-on nga 558 meters above sea level. Base sa unang pagsukod, ang bulak adunay 49 centimeters in diameter ug 30 centimeters in height.
Gipasiugda sa DENR nga importante kaayo ang maong pagkadiskubre tungod kay ang mga Rafflesia gilista isip mga threatened species ubos sa DENR Administrative Order No. 2026-20.
Sa dugang nga pagsusi sa lugar, nakit-an usab ang lima ka gagmay pa nga putot sa Rafflesia ug duha ka nalaya na nga bulak. Nagpasabot kini nga dugay nang nagtubo ang maong klase sa tanom sa maong kagubatan ug padayon gihapon ang iyang paglungtad.
Tungod niini, girekomenda sa DENR ang dayon nga pagpanalipod ug regular nga pagmonitor sa lugar aron malikayan ang kadaot sa natural nga pinuy-anan sa Rafflesia. Gihangyo usab nila nga limitahan ang pag-adto sa mga tawo sa maong lugar ug ampingan ang mga tanom ug baging nga gisaligan sa Rafflesia aron mabuhi.
Nanawagan usab ang DENR sa mga komunidad ug stakeholders nga motabang sa pagpanalipod sa nahibiling kagubatan sa nasud ug sa pagkonserbar sa mga talagsaon ug lumad nga matang sa tanom ug mananap.
Ang AlaBuyCarPanSip Watershed Forest Reserve usa sa mga importanteng protected area sa rehiyon sa Caraga nga nagsilbing puy-anan sa nagkalain-laing wildlife ug mahinungdanong tinubdan sa tubig alang sa mga komunidad sa palibot.
Photo courtesy: DENR CARAGA
