Misaka na sa 37 ang namatay human sa kusog nga magnitude 7.8 nga linog nga miigo sa kadagatan duol sa Sarangani, sumala sa Office of Civil Defense (OCD). Sa pinakabag-ong datos, 33 sa mga biktima gikan sa Region 12, diin 19 gikan sa Sarangani, 12 sa General Santos City, ug 2 sa South Cotabato. Aduna usab 4 ka sa Davao Region.
Gipahibalo sa mga otoridad nga kapin 200 ang nasamdan ug 12 pa ang missing samtang padayon ang search, rescue, ug retrieval operations sa mga apektadong lugar.
Gideklarar na usab ang State of Calamity sa General Santos City aron dali nga magamit ang pondo sa emerhensya ug mapaspasan ang relief operations. Giingon sa mga opisyal nga ang syudad mao ang labing grabeng naapektuhan, uban sa damyos sa mga building, imprastraktura, ug serbisyo publiko.
Gipahibalo usab nga gisuspenso ang klase ug trabaho sa mga pampublikong eskwelahan samtang ginahimo ang safety inspection sa mga building aron masiguro nga luwas na sa pagbalik sa klase.
Samtang, ang Civil Aviation Authority of the Philippines nagpatuman og restriction sa General Santos Airport, diin government ug humanitarian flights lang ang gitugotan hangtod Hunyo 11.
Nagpadayon usab ang deployment sa mga rescue teams gikan sa BFP ug uban pang ahensya aron makasuporta sa ongoing operations.
Photo Courtesy: The National News
