Patay nang nakit-an ang usa ka miyembro sa Citizen Armed Auxiliary o CAA sa usa ka hilit nga lugar sa Claveria, Misamis Oriental human kini mawagtang sulod sa duha ka adlaw.
Ang biktima giila lamang sa alyas “Joey,” 27-anyos, ug aktibong miyembro sa Citizen Armed Auxiliary nga naka-assign sa Sitio Kalhaan Detachment sa 58th Infantry Battalion.
Sumala sa report, ala-una sa hapon sa Hunyo 8,2026 dihang nadawat sa Claveria Municipal Police Station ang impormasyon kabahin sa usa ka patay nga nakit-an sa Sitio Impadiding, Barangay Minalwang, Claveria.
Dihang miresponde ang mga pulis uban sa Rural Health Unit ug Local Disaster Risk Reduction and Management Office, wala gilayon makaduol sa eksaktong lokasyon tungod sa impormasyon mahitungod sa presensya sa armadong grupo sa lugar.
Pinaagi sa koordinasyon sa 58th Infantry Battalion, malampusong narekober ang lawas sa biktima alas-otso sa gabii.
Base sa paunang pagsusi sa mga doktor sa Claveria Rural Health Unit, posible nga asphyxia o kakulang sa hangin ang hinungdan sa kamatayon sa biktima. Gituohang duha na ka adlaw kining patay sa wala pa kini makita.
Sa imbestigasyon, nasayran nga niadtong Hunyo 6, miadto ang biktima ug tulo niya ka kauban sa Sitio Impadiding alang sa deer-hunting activity. Didto, ilang nasugatan ang upat ka armadong kalalakin-an.
Sumala sa mga kauban sa biktima, ilang nailhan ang pipila sa mga armadong lalaki nga ilang gituohang adunay kalambigitan sa usa ka armadong grupo, ug ilang gitaho kini sa mga awtoridad. Gidala gilayon sa mga armadong lalaki ang biktima samtang gitugotan nga makalakaw ang iyang mga kauban.
Usa sa mga testigo miingon nga nakita pa niya nga gipasakitan ang biktima sa wala pa sila mibiya sa lugar alang sa ilang kaluwasan.
Padayon karon ang lawom nga imbestigasyon sa kapulisan ug militar aron matino ang tibuok detalye sa insidente ug mailhan ang mga responsable sa pagkamatay sa biktima.
Photo courtesy to: PCADG NORTHERN MINDANAO
