Nasikop ang Lima ka drug suspek nga naaktohan sa drug den nga gironda sa mga operatiba sa Philippine Drug Enforcement Agency-PDEA-13, kauban ang Surigao del Norte Police Provincial Office ug Surigao City Police Station, sa Villa Corito Subdivision, Barangay Washington, dakbayan Surigao.
Sa impormasyon nga nahipos sa Juander Radyo News Team, nabungkag ang usa ka drug den atol sa gikasa nga operasyon diin nadakpan ang mga suspek nga usa ka 50-anyos nga lalaki nga giila nga si alyas “Anonuevo,” nga giingong drug den maintainer; alyas Morales, 29-anyos, taga Espina St. Brgy. Taft, ning dakbayan, Alyas CATURLA, 31-anyos, Alyas Montilla, 28-anyos, taga Nueva St. Brgy. Taft, ning dakbayan sa Surigao (Drug Den Visitor) ug Alyas EDEN, 31-anyos, taga Narciso St. Brgy. Washington, ning syudad (Drug Den Visitor)
Narekober sa operasyon ang kapin sa 6 gramos nga gidudahang shabu nga adunay standard value nga P40,800 ug street value nga P42,000. Lakip sa mga ebidensya ang buy-bust money, cellular phones, kwarta, aluminum foil, improvised pipe, lighter ug uban pang drug paraphernalia.
Ang mga nadakpan mag-atubang og kaso sa paglapas sa Sections 5, 6, 7, 11, 12 ug 26 sa Article II sa Republic Act No. 9165. Padayon ang imbestigasyon sa mga awtoridad aron masuta kung adunay uban pang nalambigit sa ilegal nga kalihokan sa maong drug den.
