Gipasidunggan ang Juander Radyo Surigao, isip Best Partner Radio Station sa Department of Social Welfare and Development o DSWD Caraga, tungod sa dakong kontribusyon niini sa pagpalapad sa impormasyon ug mga programa sa ahensya ngadto sa katawhan.
Ang maong pag-ila nagpakita sa lig-on nga panagtambayayong tali sa estasyon ug sa DSWD sa paghatod sa tukmang impormasyon kabahin sa mga serbisyo, proyekto ug mga inisyatiba sa gobyerno alang sa kaayohan sa publiko.
Perosnal nga gidawat ni Program Director KaJuander Carl Yonson, ang plaque of recognition “ Panata ko sa Bayan, GAWAD ULAT”, ilawom sa pagpanguna ni Station Manager KaJuander Rolando Dungog, kauban sila News Director KaJuander Mike Imbo, Anchorman/Field Reporter KaJuander Ruquilito Ayento, ug Newscaster/ Field Reporter KaJuander Josephine Galito.
Sumala sa DSWD, dako ang papel sa media sa pagpahibalo sa mga komunidad mahitungod sa nagkadaiyang programa sa ahensya, ilabina sa pagtabang sa mga kabus ug vulnerable nga sektor sa katilingban.
Samtang, nagpasalamat usab ang Juander Radyo sa maong pasidungog ug misaad nga ipadayon ang responsableng pagbalita ug pagsuporta sa mga programa nga makatampo sa kalamboan ug kaayohan sa katawhan.
