Nadakpan sa usa ka buy-bust operation ang usa ka 24-anyos nga lalaki nga residente sa Barangay Lacasa, Hinatuan, Surigao del Sur, alas 8:46 sa gabii niadtong nakalabay nga adlaw.
Gipahigayon ang operasyon sa nagkahiusang pwersa sa Hinatuan Municipal Police Station ubos sa pagpanguna ni Police Captain Joey C. Monato, Assistant Chief of Police, ug mga operatiba sa Philippine Drug Enforcement Agency (PDEA) Surigao del Sur Provincial Office.
Narekober gikan sa suspetsado ang duha ka heat-sealed transparent plastic sachet nga adunay gituohang shabu. Ang maong kontrabando adunay gibanabana nga gibug-aton nga tulo ka gramo ug kantidad nga mokabat sa P20,400 sumala sa Dangerous Drugs Board. Nakuha usab sa operasyon ang buy-bust money ug uban pang drug paraphernalia.
Giinbentaryo ug gimarkahan ang mga nakompiskar nga ebidensya atubangan sa mga opisyal sa Barangay Lacasa ug representante sa media, subay sa gitakdang pamaagi sa balaod.
Sa dihang nadakpan, gipahibalo ang suspek sa iyang mga katungod ubos sa Konstitusyon. Sa pagkakaron, anaa na kini sa kustodiya sa Hinatuan Municipal Police Station alang sa hustong disposisyon ug pagpasaka sa angay nga mga kaso.
Photo courtesy: Hinatuan MPS
