Labing menos 12 ka tawo ang nasamdan sa pagpamusil nga nahitabo duol sa usa ka community festival sa Toledo, Ohio niadtong Sabado. Sumala sa kapulisan, duha sa mga biktima ang anaa sa kritikal nga kahimtang ug padayon nga gitambalan sa ospital.
Matod ni Toledo Deputy Police Chief Joe Heffernan, kalit nga mibuto ang kagubot duol sa Old West End Festival diin daghang mga residente ug bisita ang nagtigom alang sa maong kalihokan.
Dali nga mitubag ang mga awtoridad aron masiguro ang kaluwasan sa publiko ug matabangan ang mga nasamdan. Nagpadayon karon ang aktibong pagpangita sa mga suspek nga gituohang nalambigit sa maong insidente.
Gipalig-on usab sa mga tigpatuman sa balaod ang ilang operasyon samtang nagpadayon ang imbestigasyon aron masuta ang motibo ug tukmang detalye sa pagpamusil.
Samtang, mipadayag og dakong kabalaka si Ohio Governor Mike De Wine sa nahitabong trahedya. Matod niya, ang mga summer festival kinahanglan nga mahimong luwas nga lugar alang sa mga pamilya ug komunidad aron magtapok ug maglingaw nga walay kahadlok sa bisan unsang matang sa kapintasan.
Photo Courtesy: A news
