Nagpadayon ang Department of Social Welfare and Development (DSWD) Field Office 9 sa pagdawat ug pag-validate sa mga report gikan sa mga Local Government Unit human sa magnitude 7.8 nga linog nga miigo kaganinang buntag Hunyo 8, 2026.
Sa Zamboanga del Sur, padayon ang preemptive evacuation sa pipila ka mga lungsod diin sa lungsod sa Pitogo, kapin 34 ka pamilya na ang mibakwit ngadto sa mas luwas nga lugar, samtang ang mga lungsod sa San Pablo ug Tabina nagpatuman usab sa preemptive evacuation.
Sumala sa DSWD 9, ang tanang datos nagpabiling subject for validation ug padayon pa ilang pakigkoordinar sa mga LGU ug DRRM offices aron masiguro ang tukmang impormasyon.
Gipahibalo usab sa ahensya nga adunay mga relief items nga naka-preposition na sa nagkadaiyang bahin sa Zamboanga Peninsula, lakip ang Sulu ug Tawi-Tawi, aron andam sa paghatag dayong tabang kon gikinahanglan.
Nagpabiling alerto ug anaa sa active monitoring ug response mode ang DSWD 9 alang sa kaluwasan sa tanang komunidad sa Zamboanga Peninsula.
