Gipahinumdom sa Department of Labor and Employment (DOLE) ang tanang employers nga sundon ang hustong pagkwenta sa suhol sa mga trabahante atol sa pagsaulog sa Independence Day karong Hunyo 12,2026.
Matod sa DOLE, ang mga empleyadong dili mosulod sa trabaho sa regular holiday apan nakatuman sa mga kondisyon sa balaod sa labor, adunay katungod nga makadawat sa ilang tibuok adlawng sweldo.
Samtang ang mosulod sa trabaho makadawat og doble nga bayad o 200 porsiyento sa ilang adlawng suhol sulod sa unang walo ka oras.
Mas modako pa ang madawat sa mga mag-overtime ug sa mga motrabaho sa ilang rest day nga matunong sa holiday, diin adunay dugang nga 30 porsiyento nga bayad sumala sa labor regulations.
Ang Hunyo 12 gimando isip regular holiday ubos sa Proclamation No. 1006 alang sa pagsaulog sa Adlaw sa Kagawasan.
