Gipasabot sa lokal nga panggamhanan nga ang citywide alarm system sa Iligan City motingog lamang kon moabot sa Intensity 5 ang usa ka linog, subay sa mga giya ug rekomendasyon sa Philippine Institute of Volcanology and Seismology (PHIVOLCS-DOST).
Sumala sa pahibalo, ang labing bag-ong linog nga nabati sa dakbayan adunay kusog nga PEIS II hangtod PEIS III o Intensity 3 lamang, busa wala ma-aktibo ang alarma sa tibuok syudad.
Giklaro usab sa mga otoridad nga ang matag eskwelahan adunay kaugalingong katungod ug awtoridad sa pagpatunog sa ilang alarm system panahon sa emerhensiya sama sa linog, aron masiguro ang kaluwasan sa mga estudyante ug kawani.
Bisan wala motingog ang citywide alarm system, gi-awhag gihapon ang publiko nga sundon dayon ang “Duck, Cover, and Hold” kon makabati og linog ug mangadto sa luwas nga lugar kon mahuman na ang pag-uyog sa yuta.
Gipahinumdoman usab ang mga residente nga dili kinahanglan maghulat og kalamidad aron mangandam. Matod pa sa mga otoridad, ang linog dili matagna, apan pinaagi sa hustong kahibalo ug ka-andam, mahimong malikayan ang dagkong kadaot ug sa panahon sa emerhensiya.
Padayon nga gi-awhag ang tanang katawhan sa Iligan nga magpabiling alerto, kalmado, ug andam sa tanang panahon aron masiguro ang kaluwasan sa matag usa.
