Nagpabilin ang hapsay ug malinawon nga operasyon sa Bureau of Jail Management and Penology (BJMP) sa Iligan City, usa ka timailhan sa lig-on nga koordinasyon tali sa jail management ug mga kaabag nga ahensya sa gobyerno.
Gibutyag ni Jail Chief Inspector Carmelo A. Corsame nga dakong hinungdan sa maayong dagan sa jail facility ang padayon nga suporta sa lokal nga kagamhanan sa Iligan ug sa BJMP Regional Office, ilabina sa pagtubag sa mga panginahanglanon sa Persons Deprived of Liberty (PDLs).
Matod pa ni Corsame, pinaagi sa epektibong pagdumala ug suporta sa mga stakeholders, napadayon ang kahapsay, kalinaw ug seguridad sulod sa pasilidad. Gipasalamatan usab niini ang Iligan City Government tungod sa makanunayong paghatag og tabang nga nakatampo sa maayong kahimtang sa mga PDL ug sa kinatibuk-ang operasyon sa BJMP.
Dugang niya, magpadayon ang BJMP sa pagpalig-on sa mga programa ug serbisyo aron masiguro ang kaayohan sa mga PDL ug mapadayon ang disiplinado ug malinawon nga palibot sulod sa jail facility.
