Hugot nga gipahinumdom sa Department of Education nga dili obligado ug dili tugutan ang pinugos nga kontribusyon gikan sa mga magtutudlo, estudyante, ug ginikanan alang sa Brigada Eskwela.
Sumala sa DepEd, hugot nga ipatuman ang ilang “No Collection Policy” nga nagdili sa bisan unsang porma sa pinugsanay nga paniningil o pagpangayo og amotan sa komunidad sa eskwelahan.
Gipasabot sa ahensya nga ang Brigada Eskwela dili usa ka fundraising activity kondili usa ka inisyatiba sa pagtinabangay sa komunidad aron maandam ang mga tunghaan alang sa pag-abli sa klase.
Gipasalig usab sa DepEd nga adunay pondo pinaagi sa School Maintenance and Other Operating Expenses (MOOE), samtang nagpadayon ang suporta gikan sa mga ahensya sa gobyerno, LGUs, partners, ug mga volunteer.
Ang Brigada Eskwela karong tuiga gipahigayon gikan Hunyo 1 hangtod Hunyo 5 isip pagpangandam sa pormal nga pagsugod sa klase karong Hunyo 8.
Photo Courtesy:Philippine News Agency
