Padayon karon ang pagpangandam sa Nabunturan Central Elementary School SPED Center alang sa umaabot nga pagsugod sa klase sa School Year 2026–2027.
Kabahin sa ilang preparasyon ang paglimpyo sa mga classroom, pag-ayo sa mga pasilidad, ug pagpangandam sa mga kagamitan aron maseguro nga andam, limpyo, ug komportable ang palibot sa mga estudyante, ilabi na sa mga learners nga adunay espesyal nga panginahanglan.
Sa eksklusibong pakighinabi sa Juander Radyo News Team, gipahayag usab ni Marilyn R. De los Reyes, Principal III sa maong tunghaan, nga apil sa ilang mga lakang ang pag-organisa og parent orientation karong Hunyo 11, 2026.
Tumong sa maong orientation nga hisgutan ang maayong paggamit sa cellphone sa eskwelahan, alang sa mga estudyante ug magtutudlo.
Dugang pa ni De los Reyes, dili man hingpit nga gidili ang paggamit sa cellphone sulod sa eskwelahan tungod kay makatabang kini sa trabaho sa mga magtutudlo, apan kinahanglan kini og klarong limitasyon ug disiplina lakip na usab ang paggamit niini sa mga estudyante.
