Gipildi sa Gilas Pilipinas U-18 Women ang Team Vietnam pinaagi sa usa ka makabungog nga 51-point lead, sa pagtapos sa ilang engkwentro sa iskor nga 93-42 sa FIBA U18 Women’s Asia Cup SEABA Qualifiers 2026. Bisan pa man og kini ang unang dula sa Pilipinas sa maong qualifiers, opisyal ug sigurado na silang kwalipikado alang sa prestihiyosong Asia Cup proper.
Una niini, gidominar ug kontrolado sa Gilas ang kinatibuk-ang dula diin nagsugod sila pinaagi sa 19-14 lead sa 1st quarter, nga gisundan pa sa mas makalilisang nga 26-7 run sa 2nd quarter aron ituboy ang iskor ngadto sa 45-21, diin wala na makabawi pa ang Vietnam.
Ang tanang magdudula sa Gilas nakahimo og iskor sa maong dula sa pagpanguna ni Tiffany Reyes nga mibundak og 14 points, kinsa mao sab ang manguardia sa rally sa ikaduhang quarter pinaagi sa iyang impresibong opensa.
Gawas kang Reyes, mipakita usab og all-around performance ang Pinay shooter nga si Rhiane Perez human kini mikomada og 16 points alang sa kinatibuk-ang dula, uban sa iyang pito ka rebounds ug upat ka steals. Tungod sa maong hiniusang pwersa sa Gilas Women, daling napaluhod ang taga-Vietnam ug malampusong nakuha sa nasud ang maong dako ug tam-is nga kadaugan.
Photo Courtesy: Samahang Basketbol ng Pilipinas
