Mihulga ang Punong Ministro sa Hungary nga si Peter Magyar niadtong Lunes nga magsugod ang ilang gobyerno og legal nga mga pamaagi aron mapapahawa sa katungdanan si Presidente Tamas Sulyok, usa ka gitudlo sa miaging nasyonalista nga administrasyon, kon magpadayon kini sa pagdumili sa pagbiya sa iyang posisyon.
Ang sentro-tuong Tisza Party ni Magyar nakapildi kang kanhi Punong Ministro Viktor Orbán sa eleksyon niadtong Abril ug misaad nga tangtangon ang daghang mga opisyal nga gitudlo ni Orbán sa mga importanteng posisyon sa gobyerno sulod sa milabay nga 16 ka tuig, lakip na ang presidente nga adunay kasagaran simboliko lamang nga papel.
Sa makadaghan nga higayon, nanawagan si Magyar kang Sulyok—nga napili sa mga magbabalaod gikan sa partido ni Orbán nga Fidesz sa sayong bahin sa 2024—nga mohunong na sa iyang katungdanan. Giakusahan niya si Sulyok nga napakyas sa pagrepresentar sa nasudnong panaghiusa sa dagkong mga isyu ug nga nagserbisyo lamang sa interes ni Orbán ug sa iyang gobyerno. Apan padayon nga nagdumili si Sulyok sa pagresign.
Matod pa niya, mokabat og mga usa ka bulan ang proseso sa lehislatura ug maglakip kini sa pagtangtang sa tanang “papet” nga, sumala kaniya, miapil sa “pagbungkag sa rule of law ug demokrasya” panahon sa pagmando ni Orbán.
Giingon usab ni Magyar nga gamiton sa gobyerno ang ilang dos-katulo (two-thirds) nga kadaghanan sa parlamento aron usbon ang konstitusyon ug mapugos si Sulyok sa pagbiya sa iyang katungdanan, bisan wala siya maghatag og dugang detalye bahin niini.
Photo Courtesy: France 24
