Patay ang usa ka senior citizen nga babaye nga giilang si alyas “Nene”, 90-anyos ug residente sa Brgy. Montebello, Kananga, Leyte human kini madasmagi sa usa ka sakyanan nga gimaniho sa usa ka driver nga giilang si alyas “Nonoy” hingkod ang pangidaron ug residente sa Calubian, Leyte samtang kini mitabok sa pedestrian lane didto sa National Highway sa Brgy. Montebello, Kananga, Leyte, pasado alas 6 ang takna sa gabii, Hunyo 2, 2026.
Base sa inisyal nga imbestigasyon sa Kananga Municipal Police Station, nagbyahe ang usa ka Isuzu Forward nga sakyanan gikan sa syudad sa Ormoc padulong sa Calubian, Leyte sa dihang aksidenteng nabanggaan niini ang tigulang nga babaye nga mitabok sa pedestrian lane.
Tungod sa kakusog sa pag-bangga, nakaangkon ang biktima og grabeng mga samad sa nagkalainlaing bahin sa iyang kalawasan. Dali kining gidala sa Kananga Emergency Response Team (ERT) ngadto sa Kananga Municipal Hospital apan gideklarar kining dead on arrival sa attending physician.
Ang drayber ug ang sakyanan nga nalambigit sa aksidente gidala ngadto sa estasyon sa pulis alang sa hustong imbestigasyon ug disposasyon.
Samtang nagpadayon usab ang imbistigasyon sa awtoridad aron masuta ang responsibilidad sa driver sa naasoy nga aksidente.
