Sa wala pa mailhan sa kalibutan ang Zoom, FaceTime ug Google Meet, usa na ka Pilipinong siyentista ang nakamugna og teknolohiya nga nagtugot sa pagpakig-estorya samtang makita ang nawong sa kaistorya pinaagi sa video, nga mas naila karong video call.
Si Gregorio Y. Zara, natawo niadtong March 8, 1902, sa Lipa, Batangas, Philippines, usa ka inhinyero ug imbentor, giila nga nakamugna sa unang two-way videophone niadtong 1955. Ang maong imbensyon nagtugot sa duha ka tawo nga magkitaay samtang nag-estoryahay bisan pa man og layo ang ilang lokasyon.
Giila ang maong teknolohiya isip usa sa mga nag-unang lakang padulong sa modernong video communication nga gigamit karon pinaagi sa mga aplikasyon sama sa Zoom, FaceTime ug Google Meet.
Tungod sa iyang talagsaong kontribusyon sa siyensya ug teknolohiya, giila si Zara isip usa sa labing bantugang imbentor sa Pilipinas nga nakatampo sa pag-uswag sa paagi sa komunikasyon sa tibuok kalibutan.
Bisan pa nga daghan na ang mga moderno ug mas abanteng pamaagi sa video conferencing karon, nagpabiling simbolo sa kamamugnaon ug kabag-ohan sa Pilipino ang imbensyon ni Gregorio Y. Zara nga giisip nga usa sa mga pasiuna sa teknolohiyang gigamit sa digital communication sa kasamtangang panahon.
Photo Courtesy: Phil History
