Nadakpan sa operatiba sa National Bureau of Investigation-Caraga (NBI-Caraga) pinaagi sa entrapment operation si Atty. Jason C. Tan, Director sa Securities and Exchange Commission–Butuan Extension Office.
Kini tungod sa alegasyon nga nga may kalambigitan sa extortion activity. Matod sa NBI-Caraga, ang operasyon gihimo subay sa kampanya batok korapsyon subay sa direktiba ni NBI Director Melvin Matibag.
Nagsugod ang imbestigasyon human makadawat og reklamo batok sa opisyal nga giingong nangilkil gikan sa usa ka lending company isip baylo sa dili pagpasaka og kaso may kalabutan sa mga paglapas sa balaod nga nagdumala sa mga korporasyon ug lending firms.
Base sa report, ang unang gihangyo nga kantidad giingong miabot sa P650,000 apan mikunhod ngadto sa P250,000.
Gikataho nga P80,000 lamang ang marekord nga bayad samtang ang nahibiling P170,000 giingong para direktang ihatag ngadto sa opisyal. Ang maong transaksyon maoy nahimong basehan sa gihimong entrapment nga gipahigayon sa NBI.
Sa pagkakaron, si Atty. Tan gipaubos na sa preventive suspension samtang nagpadayon ang imbestigasyon.
