Nagpahayag og dako nga pagsalig ang Philippine Handball Federation nga makahimo og mas maayong resulta ang Philippine Women’s Beach Handball Team sa umaabot nga IHF Beach Handball World Championships sa Croatia gikan Hunyo 23 hangtod 28.
Matod ni PHFI President Dr. Ernesto “Jay” Adalem, andam ug lig-on ang preparasyon sa koponan ug determinado silang malabwan ang ika-12 nga pwesto nga ilang nahimo sa 2024 World Championships sa China.
Ang Pilipinas karon maoy ika-12 sa world ranking ug ikaduha sa Asia sunod sa Vietnam. Sa maong torneyo, nahimutang ang Pilipinas sa Group D kauban ang defending champion Germany, runner-up Argentina, Denmark ug Benin.
Gipahayag usab ni Head Coach Joanna Franquelli nga naglaom sila nga mas maayo ang ilang performance kumpara sa ilang miaging kampanya diin nakaangkon sila og maayong resulta batok sa ubang lig-on nga mga nasud.
Samtang, malaumon ang federation nga mas mailhan pa sa mga Pilipino ang sport nga handball nga padayon nang nagpakita og kalamboan sa international competition.
Photo Courtesy: Tempo
