Usa ka talagsaon ug makapakatawang hitabo ang nahitabo sa Pennsylvania, USA human ang usa ka bana nga nasakitan sa filing sa diborsyo sa iyang asawa, dili na lang kasingkasing ang gibungkag—apil na usab ang ilang balay!
Ang 48 anyos nga si Eric Pierwsza gituohang nakainom sa wala pa makadungog nga nakafile na og diborsyo ang iyang asawa. Matod pa niini, “Kung tapos na gyud ta, gub-on nako ang balay!”
Ug wala gyud siya nagbinuang. Misakay dayon siya sa usa ka excavator ug gisugdan og pangbungkag ang ilang balay nga mura’g nagdemolisyon sa karaang building.
Mas nakapakurat pa, naa pa diay sulod sa balay ang iyang asawa ug duha nila ka anak nga babaye samtang nagpadayon siya sa pagguba. Sa 911 emergency call, madungog matod pa ang kusog nga tingog sa nagubang mga dingding.
Maayo nalang ug walay naangol sa insidente. Human mabungkag ang likod nga bahin sa balay, misulod pa gyud ang bana aron kuhaon ang iyang gym bag ug milakaw mura’g walay nahitabo.
Sa ulahi, nadakpan siya sa kapolisan ug giatubang karon ang nagkadaiyang kaso. Busa mga kajuander, kung adunay problema sa relasyon, istoryahi lang. Kay kung balay ang inyong awayan, basin ang contractor na hinuon ang unang modaog sa diborsyo.
Photo courtesy: New York Trending Now
