Plano sa usa ka Japanese Health- tech company ang pagtukod og pabrika sa Pilipinas isip export manufacturing base, human sa state visit ni Presidente Ferdinand Marcos Jr. sa Japan.
Sumala sa Department of Trade and Industry (DTI), ang Tanita Corp. mipili sa Pilipinas isip usa sa mga posibleng lokasyon alang sa ilang gitawag nga “Factory No. 3,” nga modugang sa ilang kasamtangang mga planta sa Japan ug China.
Ang giplanohang pasilidad magdumala sa pagproseso, pag-assemble ug pag-inspeksyon sa mga produkto sa Tanita nga i-export ngadto sa Japan, Europe, America ug ubang mga nasud sa Asya. Ang kompanya nailhan sa paghimo og weighing scales, body composition analyzers, commercial kitchen scales ug uban pang health-related devices sama sa breathalyzers.
Bisan wala pa ipadayag ang kantidad sa pamuhunan, giingon sa DTI nga ang proyekto mahimong makamugna og kapin P2 bilyon nga export sales ug makahatag og mga 500 ka trabaho sulod sa lima ka tuig gikan sa pagsugod sa komersyal nga operasyon.
Matod ni Trade Secretary Cristina Roque, ang giplanong pagpalapad sa operasyon sa Tanita nahiuyon sa tumong sa gobyerno nga makadani og mas dagkong pamuhunan sa manufacturing sector nga adunay taas nga kantidad.
Gawas sa interes sa Tanita, giingon usab sa DTI nga ang Japanese nga agri-tech firm nga E-SupportLink Ltd. nagpakita og interes sa pagpalapad sa ilang presensya sa Pilipinas.
Partikular nga gitutokan sa kompanya ang mas lapad nga paggamit sa artificial intelligence (AI) ug drone technology aron mas mapalambo ang pagmonitor sa mga plantasyon ug mas sayo nga madeteksyon ang mga sakit sa tanom.
Ang maong mga plano gilauman nga makatabang sa pagpalig-on sa sektor sa manufacturing ug agrikultura sa nasud samtang nagmugna usab og dugang nga trabaho ug oportunidad alang sa mga Pilipino.
