Padayon karon ang diskusyon sa nasud kabahin sa posibilidad nga mapostpone na usab ang Barangay ug Sangguniang Kabataan Elections (BSKE) nga gitakdang ipahigayon sa Nobyembre 2026.
Subay sa kasamtangang balaod nga Republic Act No. 12232, ang BSKE nakatakda nga ipahigayon matag unang Lunes sa Nobyembre ug mosunod kada upat ka tuig. Apan, samtang nagkadako ang diskusyon sa posibleng pagbalhin sa eleksyon, nagkadaiya usab ang panan-aw sa mga lider sa barangay ug sa komunidad.
Nipadayag usab si Kapitan Rochie Torrejas sa Barangay Libasan, Nabunturan Davao de Oro, nga pabor siya nga ipadayon ang eleksyon aron mahatagan ug kahigayunan ang mga indibidwal nga adunay tinguha nga mosulod sa serbisyo publiko isip barangay opisyal.-
Bisan pa niini, gipasabot ni Torrejas nga samtang wala pa ang eleksyon, magpadayon gihapon siya sa iyang katungdanan isip amahan sa barangay, ug magpokus sa pagserbisyo sa komunidad.
Lakip sa iyang gi-awhag ang pagtinabangay sa mga residente, ilabina karong panahon sa balik-eskwela, aron masiguro ang kaayohan sa kabataan ug sa tibuok barangay.
