Kapin pito sa matag napulo ka hamtong nga Pilipino ang pabor nga ipadayon ang impeachment trial batok kang Vice President Sara Duterte, sumala sa pinakabag-ong resulta sa Masa survey sa OCTA Research.
Gipakita sa survey nga 74 porsyento sa mga respondent ang misuporta sa impeachment trial, mas taas kumpara sa 69 porsyento nga natala niadtong Marso 2026. Samtang 15 porsyento ang misupak ug 11 porsyento ang wala pa makapili og baruganan.
Pinakataas ang suporta sa Metro Manila nga adunay 84 porsyento, gisundan sa Balance Luzon nga adunay 78 porsyento ug Visayas nga adunay 77 porsyento.
Sa Mindanao natala ang pinakagamay nga suporta sa 54 porsyento, apan mao usab ang adunay pinakataas nga porsyento sa mga misupak sa impeachment trial nga miabot sa 41 porsyento.
Gipahigayon ang survey pinaagi sa face-to-face interviews sa 1,200 ka mga respondent nga adunay edad 18 anyos pataas gikan Abril 20 hangtod 24, 2026. Matod sa OCTA Research, ang maong survey independente, wala gipakomisyon, ug non-partisan.
Photo Courtesy: Manila Times
