Magkahiusa ang Department of Education (DepEd) Bukidnon uban sa nagkalain-laing sektor sa katilingban alang sa umaabot nga Brigada Eskwela nga ipahigayon gikan Hunyo 1 hangtod Hunyo 5, 2026, isip pagpangandam sa pag-abli sa klase sa Hunyo 8, School Year 2026–2027.
Sumala kang Dr. Rollen Sumo-oy, Senior Education Program Specialist for Networking sa Department of Education Bukidnon, ang division-level kick-off ceremony pagahimuon sa Miarayon Central Elementary School sa Talakag. Matag tuig ginapuli-puli ang host venue tali sa amihanan ug habagatang bahin sa probinsya.
Gipasiugda nga dako ang suporta sa lokal nga panggamhanan sa Talakag ug sa mga eskwelahan sa pagpahigayon sa maong kalihokan. Ang mga donasyon nga madawat dili lang para sa usa ka eskwelahan kondili para usab sa ubang eskwelahan sa dibisyon.
Tumong sa Brigada Eskwela nga masiguro ang limpyo, luwas, ug andam nga palibot sa pagkat-on, aron sa unang adlaw sa klase magatutok dayon sa pagtudlo ug dili na sa pagpanglimpyo.
Giawhag ni Dr. Sumo-oy usab ang publiko—ginikanan, negosyante, relihiyosong grupo, ug uban pang stakeholders—nga moapil pinaagi sa boluntaryong oras, kusog, ug donasyon isip bahin sa espiritu sa bayanihan
Photo Courtesy: DepEd Bukidnon
