Narekober sa mga otoridad ubos sa Police Regional Office 10 (PRO-10) ang walo ka buok sa 81mm High Explosive mortar rounds nga nadiskobrehan sa usa ka lasang nga bahin sa Sitio Furchacu IV, Barangay Malinao, Kalilangan, Bukidnon niadtong Mayo 27, 2026.
Ang maong mga eksplosibo aksidenteng nakit-an sa usa ka 35-anyos nga mag-uuma nga giila sa alyas “Mando” samtang nangahoy kini sa maong dapit.
Human madawat ang report gikan sa 1004th Maneuver Company, daling miresponde ang Explosive Incident Response Team (EIRT) sa Regional Explosive Ordnance Disposal and Canine Unit 10 aron susihon ang lugar. Sa gihimong assessment sa mga eksperto, nakumpirma nga bisan pa man og aduna nay mga taya ang maong mga bomba, anaa pa gihapon kini sa delikado ug daling mobuto nga kahimtang (serviceable condition).
Gipahigayon dayon sa mga otoridad ang Render-Safe Procedures pinaagi sa Pick-Up and Carry Away techniques aron masiguro ang luwas nga pagkuha ug pagbalhin sa mga eksplosibo. Malampuson ug luwas nga nakuha ang mga bomba nga walay natala nga bisan unsang dautang insidente, ug gidala kini ngadto sa Bukidnon PECU Office alang sa temporaryong paghipos ug saktong disposisyon.
Tungod sa maong kalamposan, gidayeg ni PRO-10 Regional Director PBGEN Christopher N. Abrahano ang paspas ug propesyonal nga aksyon sa mga responders. Iyang gipasiugda nga ang dinaliang pagresponde sa kapulisan dako og naitulong aron malikayan ang posibleng peligro sa publiko ug mapadayon ang kalinaw sa komunidad
Photo Courtesy: PRO-10
