Gihingusgan ni Brgy. Kapitan Edward A. Lariano ang padayon nga paningkamot sa barangay sa paghatag og serbisyo ug mga proyekto alang sa kaayohan sa katawhan sa Barangay Abuno.
Matod sa kapitan, usa sa mga prayoridad karon sa barangay mao ang pag-ayo sa tulay sa Malindawag nga naputol tungod sa bagyong “Basyang.” Giingon niya nga gisugdan na ang pag rehabilitar sa maong tulay ug gilauman nga maablihan kini sa sunod bulan, samtang mahimo na kining fully passable pag-abot sa bulan sa Agosto.
Bisan pa sa mga hagit nga giatubang sa barangay, nagpadayon gihapon ang lokal nga panggamhanan sa paghatag og mga programa sama sa livelihood assistance, pagpanghatag og seedlings gikan sa barangay ug syudad, ug medical missions alang sa mga residente.
Gidasig usab ni Kapitan Lariano ang tanang lumulupyo sa padayon nga kooperasyon ug pagtinabangay aron mapadayon ang kalamboan sa ilang komunidad.
Giingon niya nga andam kanunay ang barangay sa pagserbisyo sa katawhan nga walay pili ug walay kolor sa politika.
