Gibutyag sa kadumalahan sa Philippine Coconut Authority (PCA) Iligan ug Lanao del Norte ngadto sa publiko ang detalyadong kasayuran kalabot sa ilang gipatuman nga checkpoint operations, nga gitumong sa pagpanalipod sa industriya sa lubi ug sa pagsumpo sa ilegal nga mga kalihokan nga may kalabutan sa coconut products.
Kini ang pamahayag ni Engr. Faiz Macakiling, Division Head sa Philippine Coconut Authority Iligan ug Lanao del Norte Provincial Office, atol sa iyang pagbisita ug esklusibong pakighinabi sa Juander Radyo News Team sa buhatan sa PCA.
Sumala ni Engr. Macakiling, ang nag-unang tumong sa checkpoint operations mao ang pagpamenos ug pagpakunhod sa ilegal nga mga transaksyon sa coconut lumber, ilabi na ang walay hustong permit ug dokumento.
Matod pa niya, dako ang epekto sa illegal cutting ug illegal trading sa lubi sa panginabuhian sa mga mag-uuma ug sa resources.
Dugang pa niini, gilatid usab ni Macakiling nga lakip sa gibantayan sa checkpoints ang pagbiyahe ug pagbaligya sa ubang coconut products sama sa charcoal ug copra.
Nunot niini iyang gipasidaan sa mga negosyante ug biyahero nga ang maong mga produkto kinahanglan una nga magparehistro ug mokuha og permit sa PCA aron malikayan ang paglapas sa balaod.
Gipatin-aw usab ni Macakiling nga ang bisan unsang coconut lumber nga ibyahe o ipatuman ang transaksyon nga walay permit dakpon ug ipatuman ang legal nga aksyon, tungod kay kini usa ka klarong paglapas sa Republic Act No. 8048, o ang balaod nga nag-regulate sa pagputol ug pagdumala sa mga kahoy sa lubi.
Nanawagan ang PCA Iligan ug Lanao del Norte sa publiko, ilabi na sa mga negosyante ug mag-uuma, nga motuman sa balaod ug makig-koordinar sa ilang buhatan, aron mapanalipdan ang industriya sa lubi ug masiguro ang lig-on ug malungtarong panginabuhian sa mga Pilipinong mag-uuma.
