Gipadayag ni Atty. Marlene Young ang dakong kalipay ug pagpasalamat sa pag-abot sa mga batakang serbisyo ngadto sa Barangay Abuno pinaagi sa “Asenso Iliganon Serbisyo Caravan” nga gipahigayon sa administrasyon ni Frederick W. Siao niadtong nakalabay nga adlaw.
Ang maong kalihokan nagdala og nagkadaiyang serbisyo gikan sa lokal nga kagamhanan aron matubag ang mga panginahanglan sa katawhan, ilabi na sa mga residente nga nagpuyo sa mga hinterland barangay.
Matod ni Atty. Young, dako kaayong kaayohan ang maong programa tungod kay napaduol niini ang mga serbisyo sa gobyerno ngadto sa katawhan nga dili na kinahanglan pa moadto sa dakbayan aron makabenepisyo sa maong mga serbisyo.
Dugang niya, usa kini sa tumong sa administrasyon nga mapalawom ug mapalig-on ang pagserbisyo publiko pinaagi sa pagpaduol sa mga programa ug tabang ngadto sa katawhan nga nagkinahanglan niini.
Ang Asenso Iliganon Serbisyo Caravan padayon nga naghatag og serbisyo medikal, ayuda, konsultasyon, ug uban pang programa isip kabahin sa paningkamot sa syudad sa paghatag og mas epektibo ug accessible nga serbisyo publiko ngadto sa tanang Iliganon.
