Sukad sa paglingkod ni Ralph Oblenda isip pangulo sa Iligan City Traffic Parking Management Office, iyang namatikdan nga daghang traffic violators ang wala motagad sa mga citation tickets nga giisyu sa ICTPMO.
Matod pa niya, dili usab kaya sa ilang opisina nga kanunay magpasaka og kaso sa Hall of Justice alang lamang sa gagmay’ng mga violations tungod kay makadugang kini sa ilang mga buluhaton.
Giingon ni Oblenda nga mao kini ang ilang ginabuhat kaniadto, apan sa pagkakaron ilang gipangitaan og mas epektibong solusyon aron dali ug hustong maatiman ang maong mga paglapas. Tungod niini, nakigkoordinar sila sa Land Transportation Office pinaagi sa usa ka Memorandum of Agreement (MOA).
Subay sa maong kasabutan, ang mga traffic violators kinahanglan nga moatiman sa ilang citation tickets sulod sa pito (7) ka adlaw gikan sa pagkaka-isyu niini. Kon mapakyas sila sa pagtuman sa maong direktiba, ang ilang kaso ipasa na sa LTO aron kini na ang mohatag sa angayng aksyon.
Base sa gipirmahang MOA, posible nga dili marehistro o marenew ang ilang motorsiklo o sakyanan, ug mahimo usab maapektuhan ang pag-renew sa ilang driver’s license kon dili nila maatiman ang ilang mga obligasyon sa ICTPMO.
