Nagpadayon ang Bureau of Jail Management and Penology (BJMP) sa pagpasiguro sa maayong kahimtang sa mga Persons Deprived of Liberty (PDLs) sulod sa Jail Facilities sa Iligan City.
Matod ni JCINSP CARMELO A. CORSAME, atol sa pakighinabi sa Juander Radyo News Team nga matag adlaw ginapahigayon sa BJMP ang “Oplan Greyhound” usa ka regular nga inspeksyon sa mga pasilidad aron mamintinar ang kahapsay, kalimpyo, ug seguridad sa mga PDLs.
Gipasabot ni CORSAME nga pinaagi sa maong operasyon, masiguro nga maatiman pag-ayo ang mga pasilidad ug mapadayon ang disiplina ug kaayohan.
Dugang pa, importante ang padayon nga pagmonitor aron malikayan ang bisan unsang hulga sa seguridad ug aron mapalambo ang kahimtang sa pagpuyo sulod sa jail facility.
Ang maong inisyatiba kabahin sa mas hugot nga kampanya sa BJMP aron masiguro ang luwas, organisado, ug makatawhanong pagdumala sa BJMP dihi sa dakbayan sa Iligan.
