Mipadayag ang Iligan City Police Office, nga padayon ug lig-on ang ilang kampanya batok sa kriminalidad sa dakbayan sa Iligan human gibutyag ni PMaj. Zandrex Panolong ang mga nahimong kalampusan sa kapolisan atol sa pakighinabi sa Juander Radyo Iligan.
Sumala kang Panolong, nagpakita ang sunod-sunod nga operasyon sa kapolisan nga seryoso ug walay pag-undang ang ilang paningkamot aron mapreserbar ang kalinaw ug kaluwasan sa syudad.
Lakip sa ilang gipasiugda ang mas hugot nga police visibility, anti-illegal drugs operations, kampanya batok sa mga wanted persons, ug paspas nga responde sa mga insidente sa komunidad.
Gipunting usab niini nga ang nagkadaiyang accomplishment sa kapolisan maoy ebidensya nga epektibo ang koordinasyon tali sa kapolisan ug sa katawhan sa pagpakunhod sa kriminalidad sa Iligan City.
Dugang pa ni Panolong, padayon nilang palig-onon ang intelligence monitoring ug mga operasyon aron mapadayon ang malinawon ug luwas nga palibot alang sa tanang residente.
Nanawagan usab siya sa publiko nga magpadayon sa pakigtambayayong sa kapolisan pinaagi sa dayong pagreport sa mga kahina-hinalang kalihokan sa ilang lugar.
