Nagpadayon ang Information and Communication Technology Center-Iligan (ICTC-Iligan) sa pagpalapad sa Free Public Internet Access Program human miabot ang dugang 10 ka internet devices nga ipakatag sa nagkalain-laing pampublikong lugar sa syudad aron mas daghang residente ang makabenepisyo sa libre nga koneksyon sa internet.
Matod ni OIC Head Nouvelle Krish Aehmery A. Lagapa, Information Technology Officer I sa ICTC-Iligan, adunay na karon 15 ka existing access point locations nga aktibong naghatag og libreng internet access sa publiko.
Sa pakighinabi sa Juander Radyo Iligan 89.1, gipahayag ni Lagapa nga target sa ICTC nga mapadako pa ang coverage sa programa pinaagi sa pagdugang og access points sa mga lugar nga kasagarang adtoon sa mga tawo alang sa ilang transaksyon sa gobyerno.
Lakip sa mga gipropose nga lokasyon alang sa dugang libre nga WiFi mao ang gawas nga bahin sa City Engineer’s Office ug Iligan City Waterworks System (ICWS), diin daghang kliyente ang nagproseso og building permits, water applications, ug uban pang serbisyo.
