Nagpahimangno ang Philippine Coconut Authority (PCA) Iligan ug Lanao del Norte Provincial Office sa publiko nga higpit nga sundon ang mga regulasyon sa pagbiyahe ug pagbaligya sa mga produkto sa lubi aron malikayan ang paglapas sa balaod ug posibleng kaso.
Gibutyag ni Engr. Faiz Macakiling, Division Head sa PCA Iligan ug Lanao del Norte Provincial Office, nga niaging tuig adunay lima ka indibidwal nga napasakaan og kaso tungod sa paglapas sa mga regulasyon nga may kalabotan sa transportasyon sa coconut products.
Dugang pa niya, adunay usab mga nadakpan nga nagbiyahe nga walay igong dokumento ug permit alang sa ilang gidala nga produkto sa lubi.
Sumala sa PCA, importante nga adunay kompletong dokumento ug permit ang matag indibidwal o negosyante nga mag-transport og coconut products aron maseguro nga legal ug luwas ang pagbalhin niini gikan sa usa ka lugar ngadto sa lain.
