Nasakmit sa Eastern Visayas Regional Athletic Association (EVRAA) Table Tennis team ang kampyonato human nakuha ang Gold Medal sa Team Event Category – Doubles atol sa nagpadayong Palarong Pambansa 2026.
Gidominar sa delegasyon sa Region VIII ang nasudnong kompetisyon pinaagi sa hiniusang abilidad ug determinasyon sa mga atleta nga sila Bel Jesumper Delgado-Abelo, Camillus Francis E. Roxas, Jude Michael P. Aquino, ug Mel Anthony Logrosa.
Pinaagi sa ilang epektibong taktika ug lig-on nga mental fortitude, malampusong napukan sa maong squad ang mga lig-on nga delegasyon gikan sa ubang rehiyon sa nasod. Gikan sa sinugdanan sa dula hangtod sa mga krusyal nga rally, gipakita sa mga “Golden Stingers” ang ilang labaw nga abilidad sa maong isports.
Kini nga kadaugan giila nga usa ka mahinungdanong marka sa kasaysayan sa EVRAA, nga nagpakita sa bunga sa taas nga panahon sa training, disiplina, ug sakripisyo sa mga atleta, lakip na ang gihatag nga suporta sa ilang mga coach ug pamilya.
Ang maong kalamposan nagsilbing garbo sa tibuok komunidad sa Eastern Visayas ug nagpamatuod nga ang Region VIII usa na ka powerhouse sa natad sa Table Tennis sa tibuok Pilipinas.
