Padayon nga gipalig-on ang information dissemination campaign sa Department of Migrant Workers sa Zamboanga del Sur, aron mapanalipdan ang mga OFW ug job seekers batok sa illegal recruitment activities.
Sumala ni DMW Zamboanga del Sur Provincial Chief Kinnymar Panares, pinaagi sa gihimo nila regular nga community-based information drive sa social media ug sa broadcast daghan ang napahimangnoan aron makalikay sa illegal recruiters and human traffickers.
Gawas sa maong lakang, gitudloan usab nila ang publiko sa hustong pag-verify sa mga recruitment agency ug job orders pinaagi sa opisyal nga proseso sa DMW.
Gapahimangno usab siya sa tanan nga magmatngon sa mga job offer nga adunay dakong sweldo ug pagpangayo ug bayad bisan wala pay kontrata sa social media nga mga transaksyon.
Dugang pa, padayon usab ang ilang koordinasyon sa mga lokal nga kagamhanan ug law enforcement agencies aron mapadali ang pag-imbestiga ug pagpasaka og kaso batok sa mga illegal recruiter.
Alayon niini, gidasig usab ni Panares ang tanang aspiring OFWs nga mokonsulta una sa ilang opisina sa dili pa mo-apply aron malikayan ang pagkabiktima sa illegal recruitment.
