Padayon nga nagpasundayag og kusog ang Cebu Greats human nilang gilubong ang Manila Batang Quiapo, 128-83, sa MPBL Season sa Novadeci Convention Center sa Quezon City.
Pinaagi sa maong kadaugan, naabot sa Greats ang ilang ikalimang sunod-sunod nga daog ug gipalig-on ang ilang rekord ngadto sa 7-2.
Nagdilaab sa opensiba si Mark Meneses nga mihapak og 20 puntos ug 11 rebounds samtang si Dhon Reverente miposte usab og double-double pinaagi sa iyang 14 puntos ug 17 rebounds. Si Kint Ariar nisalmot usab sa dominante nga kampanya pinaagi sa 12 puntos, 11 rebounds, upat ka assists ug usa ka steal.
Dugang kusog alang sa Cebu si Ron Dennison nga nakatampo og 14 puntos, samtang sila si Isaiah Hontiveros ug Jonathan Ralf Gesalem mipuntos matag usa og 10 puntos aron mas mapadako pa ang bentahe sa ilang koponan.
Sayong bahin pa lang sa duwa, klaro na ang kontrol sa Greats human sila mikalas og 36-23 nga abante sa unang kuwarter. Wala na usab sila makalingiw sa ilang ritmo hangtod nga ilang giatiman ang 71-49 nga bentahe sa first half ug 105-74 sa pagtapos sa ikatulong yugto.
Bisan dako na ang ilang labaw, wala gihapon mohinay ang Cebu nga padayon pang miitsa og puntos hangtod nahimo kining usa ka makabungog nga 45 puntos nga pagdemolis sa Batang Quiapo.
Photo Courtesy: Sunstar
