Nasakmit sa San Miguel Municipal Police Station ang gibanabanang ₱90,000 nga kantidad sa undocumented nga Magium lumber ug nadakpan ang usa ka suspek atol sa operasyon batok sa illegal logging sa Barangay Libas Gua niadtong gabii sa Mayo 26.
Giila ni Police Major JOEMEL L. MAQUILING ang nadakpan nga suspek pinaagi sa alyas nga “Jojo,” 39 anyos, minyo, drayber, ug residente sa Purok 4, Barangay Libas Gua, San Miguel, Surigao del Sur.
Sumala sa kapulisan, gilunsad ang operasyon mga alas-6:40 sa gabii human makadawat og report gikan sa concerned citizen bahin sa usa ka sakyanan nga nagkarga og giingong iligal nga troso.
Dali nga mipahimutang og interception point ang mga personnel sa San Miguel MPS sa Purok 4, Barangay Libas Gua, diin ilang gipara ang usa ka puti nga Isuzu truck nga adunay plaka nga KGA 717.
Sa inspeksyon sa sakyanan, nadiskubrehan ang mga 2,700 board feet sa bag-ong tabas nga Magium lumber. Apan, napakyas ang drayber sa pagpakita og legal nga transport permit ug cutting documents gikan sa Department of Environment and Natural Resources o DENR.
Sa pagkakaron, anaa na sa kustodiya sa kapulisan ang suspek samtang gi-impound usab ang truck ug ang nasakmit nga mga kahoy sa estasyon sa pulisya.
Giapandam na usab ang kasong paglapas sa Section 77 sa Presidential Decree No. 705 o Revised Forestry Code of the Philippines batok sa suspek.
Photo courtesy: San Miguel MPS
