Malipayong gipahibalo sa sikat nga aktres ug content creator nga si Kiray Celis ug sa iyang bana nga si Stephan Estopia nga usa ka baby boy ang ilahang umaabot nga first baby. Nasayran kini pinaagi sa usa ka mubo nga video sa gender reveal party nga gitambongan sa ilang pamilya ug suod nga mga higala, diin dako ang kalipay sa magtiayon human miulbo ang asul nga aso.
Kaniadtong miaging bulan, emosyonal usab nga gishare sa magtiayon ang video diin nakuha ni Kiray ang positibo nga resulta sa iyang pregnancy test. Matod sa aktres, ang maong bata mao ang labing tam-is nga tubag sa tanan nilang mga pag-ampo. Nagpaabot usab si Stephan og mensahe sa iyang kahinam nga mamahimong usa ka amahan ug iyang gisaulog ang unang Mother’s Day ni Kiray.
Gawas niini, gibutyag na usab sa magtiayon ang pipila sa ilang mga celebrity friends nga mamahimong ninong ug ninang sa bata, lakip na silang Julia Montes, Miles Ocampo, Enchong Dee, ug Arci Muñoz. Sa usa ka interview, nagpasalamat si Kiray sa tiunay nga gugma sa iyang bana ug masaligon siya nga mamahimong maayong amahan si Stephan sa ilang pamilya.
Sa iyang naandan nga pagka-komedyante, nagpasumbingay pa si Kiray nga nanghinaot siya nga nindot ang kombinasyon sa ilang liwat aron dili na sila mag-trending sa social media. Sulti niya, kon dili man gani nindot ang resulta, mas maayo pa nga mag-migrate o manimuyo nalang sila sa laing nasod aron dili na makit-an sa mga tawo.
Photo Courtesy: Manila Bulletin
