Nakurat ang mga netizen human gikumpirmar nga opisyal nang minyo sila Kai Sotto ug actress-model nga si Rere Madrid.
Gianunsyo sa usa ka photo ug videography company pinaagi sa social media niadtong Mayo 27 ang pagpakasal sa duha, uban sa mensaheng nagpamatuod nga opisyal na silang magtiayon.
Sa Instagram post, gipadayag ni Rere Madrid ang iyang kalipay ug emosyon sa ilang panaw isip uyab hangtod sa ilang kasal, diin iyang gihulagway nga “surreal” ang maong adlaw alang nilang duha.
Nagpasalamat usab siya sa Diyos, sa ilang pamilya, ug sa mga tawo nga misuporta sa ilang relasyon bisan sa mga pagsulay ug dili pagsinabtanay nga ilang naagian.
Matod pa ni Rere, mas napalig-on pa ang ilang relasyon pinaagi sa pagsalig ug suporta sa usag usa, ug usa sa labing malipayong bahin alang kanila ang paghiusa sa ilang duha ka pamilya.
Si Kai usab nagpost og susamang mensahe sa iyang social media account. Una nang gihimong public ang ilang relasyon niadtong Hulyo 2024 atol sa ilang pagtambong sa usa ka gala event isip mag-uyab.
Photo courtesy to: Niceprintphoto IG
