Gilusad sa Department of Finance (DOF) ug Bureau of Internal Revenue (BIR) ang Taxpayer Portal alang sa mga rehistradong negosyante nga anaa ubos sa Large Taxpayers Service Mayo 26, 2026.
Tinguha sa bag-ong plataporma nga himoon nga mas sayon ug organisado ang pagdumala sa tax records ug transaksyon sa mga dagkong negosyante.
Pinaagi sa portal, mamahimong makita sa mga taxpayer ang mga detalye sa ilang rehistrasyon, masubaybayan ang mga tax return, matultolan ang mga bayad, ug makadawat og mga pahinumdom gikan sa sistema.
Sa iyang diskurso, gihugtan ni Finance Secretary Frederick D. Go nga ang TP Portal magwagtang sa kalibog sa paggamit sa nagkadaiyang sistema ug maghatag og mas tin-aw nga lantaw sa mga tax records.
Gidayeg usab niya ang pamunoan sa BIR sa pagpangulo ni Commissioner Charlito Martin R. Mendoza sa pagtuman sa saad nga reporma ug digital transformation.
Sumala ni Commissioner Mendoza, ang TP Portal kabahin sa serye sa mga digital initiatives sa BIR karong tuiga (2026), lakip na ang Interactive Digital Tax Calendar, QR Code Verification System, ug ang Digital TIN sa eGovPH App. Dugang pa niya, ang pilot implementation nakatutok una sa mga dagkong taxpayer aron mas mapalambo pa ang sistema sa dili pa kini i-implementar sa kinatibuk-an.
Giisip sa DOF ug BIR ang paglunsad isip usa ka dako nga lakang padulong sa mas paspas, mas transparent, ug mas epektibo nga kagamhanan.
Kini nga milestone gilauman nga magpataas sa kompiyansa sa mga negosyante ug mamumuhunan sa Pilipinas isip usa ka lig-on ug andam nga ekonomiya.
Photo courtesy: Daily Tribune
