Posibleng maapektuhan ang taliwala sa 100,000 hangtod 200,000 ka mga Pilipino tungod sa bag-ong polisiya sa Amerika kabahin sa green card applications, sumala kang Jose Manuel Romualdez. Matod niya, ang mga Pinoy nga naa na sa US ug didto naghulat sa ilang green card mahimong pauli-on una sa Pilipinas aron didto iproseso ang ilang aplikasyon.
Subay kini sa bag-ong gi-anunsyo sa U.S. Citizenship and Immigration Services nga ang adjustment of status o pag-apply og legal permanent residency samtang naa sulod sa Amerika, ihatag na lamang sa mga “exceptional cases” o espesyal nga kahimtang. Pasabot niini nga mas palabihon na sa US ang consular processing pinaagi sa mga embahada ug konsulado sa gawas sa Amerika.
Gipasabot ni Romualdez nga usa sa mga rason sa maong polisiya mao ang kadaghan sa mga aplikante nga dili na mogawas sa US kon ma-deny ang ilang aplikasyon. Dugang pa niya, nabug-atan na usab ang immigration processing centers sa Amerika tungod sa milyon-milyon ka aplikasyon nga ilang giatubang matag tuig.
Bisan pa niini, gipasalig sa embahador nga walay problema alang sa mga Pilipino nga naa sa Pilipinas ug didto naghulat sa ilang immigrant visa pinaagi sa US Embassy o consulate. Posible usab nga adunay exemptions alang sa humanitarian cases sama sa mga tigulang o adunay seryosong rason nga dili makapauli samtang naghulat sa resulta sa ilang aplikasyon.
Photo Courtesy:Spar Bernstein
