Nagsaad si Pangulong Ferdinand Marcos Jr. og bug-os nga suporta sa gobyerno alang sa Philippine sports atol sa opening ceremony sa 2026 Palarong Pambansa sa Agusan del Sur niadtong Domingo.
Pinaagi kang Special Assistant to the President Antonio Ernesto Lagdameo Jr., gipasiugda ni Marcos nga ang sports dili lamang makapalig-on sa lawas kundili makatabang usab sa paghulma sa disiplina, panaghiusa, respeto, pagkamainantuson ug kumpiyansa sa mga kabatan-onan.
Ubos sa tema nga “Unlocking the Future Through Sports,” nagtigom ang maong kalihukan og kapin 10,000 ka student-athletes gikan sa 18 ka rehiyon, lakip ang National Academy of Sports ug Philippine Sports Overseas.
Giingon usab sa Presidente nga padayon nga gipalig-on sa administrasyon ang school sports clubs ug gipadako ang oportunidad sa mga estudyante sa organisadong sports. Gibanabana nga kapin 6,000 ka eskwelahan na ang naapod-aporan og sports equipment ug supplies gikan 2022 hangtod 2025 aron mas mapalambo ang ensayo sa mga batan-ong atleta.
Gipasiugda usab ni Marcos ang “Grassroots to Gold” program sa Department of Education ug Philippine Sports Commission nga nagtumong sa paggiya sa mga maayong atleta gikan sa school competitions padulong sa international level.
Gidayeg usab sa Presidente ang mga kabataang Pilipinong atleta tungod sa ilang mga kadaugan sa international competitions sama sa ASEAN School Games sa Brunei diin nakakuha ang Pilipinas og 43 ka medalya.
Sa iyang mensahe, giawhag ni Marcos ang tanang partisipante nga magdula uban ang dungog, pagpaubos ug maayong sportsmanship, samtang gihinumdoman nga ang matag kompetisyon usa ka higayon sa pagkat-on ug pagdasig sa nasud.
Photo Courtesy:PNA
