Nagpadayon ang hot pursuit operation sa Padada Municipal Police Station human usa ka babaye ang gipusil sa Purok 2, Barangay Southern Paligue, Padada, Davao del Sur.
Sumala sa report, bisan pa sa kalisod sa lokasyon ug hinay nga signal sa komunikasyon, nakaresponde dayon ang mga pulis ug pag-abot sa lugar, nahibal-an nga nadala na sa MDRRMO ngadto sa Davao del Sur Provincial Hospital ang biktima giila nga si alyas “Fe”.
Base sa inisyal nga imbestigasyon, sakay sa traysikel ang biktima uban sa saksi paingon sa Barangay Punta Piape sa dihang gisundan sila sa usa ka itom nga motorsiklo nga gisakyan sa duha ka wala pa mailhing lalaki.
Pag-abot sa Kawayan, Southern Paligue, kalit matod pa gipusil sa back rider ang biktima ug dayong miikyas sa wala matino nga direksyon.
Sa pagkakaron, anaa sa maayong kahimtang ang biktima samtang padayon ang imbestigasyon aron mailhan ug madakpan ang mga responsable sa insidente.
