Padayon ang kusog nga kampanya sa Moalboal sa inaugural Calderon Cup 21-Under Inter-Municipalities Women’s Volleyball Tournament human nilang gipilde ang Badian ug Dumanjug.
Pinaagi sa 4-0 nga rekord, nagpabilin nga solo lider ang Moalboal sa walo ka lungsod nga miapil sa torneyo gikan sa 7th District sa Sugbo.
Una nilang gipildi ang Dumanjug sa score nga 25-13, 25-21, diin nag-una si Marnie Tapales og pito ka puntos. Gisundan kini sa lisod apan malampusong kadaogan kontra host Badian, 28-26, 25-22, uban ni Cecilia Gocotano nga nakahatag og lima ka puntos.
Sa laing duwa, gipildi sa Badian ang Malabuyoc, 25-15, 25-11, samtang nakabangon usab ang Malabuyoc pinaagi sa ilang kadaogan kontra Ginatilan, 25-20, 25-16. Gipilde usab sa Alcantara ang Ronda, 25-11, 25-19, ug midaog ang Dumanjug kontra Alegria, 25-11, 25-21.
