Patay ang 90 ka indibidwal human sa pagbusikad sa usa ka minahan sa karbon sa northern China. Nahitabo ang gas explosion sa Liushenyu Coal Mine nga gipadagan sa Tongzhou Group sa Shanxi Province.
Gatusan ka rescuers ang gipadala sa lugar aron mangita sa mga biktima sa pagbuto. Didto usab sa lugar ang mga paramedics ug ambulansya, samtang kapin sa 100 ka tawo ang gidala sa mga ospital aron matambalan.
Base sa mga report, adunay 247 ka minero nga anaa sulod sa minahan sa dihang nahitabo ang pagsabog. Gumikan sa insidente, nanawagan si Xi Jinping nga walay sayangon nga oras sa pagtambal sa mga nasamdan ug pagpangita sa mga posible pang survivor.
Gimandoan usab sa Chinese President ang gobyerno nga imbestigahan ang hinungdan sa aksidente ug papanubagon ang mga responsable.
Matod pa sa state media, gidetine na ang mga opisyal nga nagdumala sa maong coal mine. Sa pagkakaron, wala pa gipagawas ang eksaktong hinungdan sa pagbussikad, apan base sa report, milapas na sa limitasyon ang lebel sa carbon monoxide usa ka makahilong gas nga walay baho nga nadiskobrehan sulod sa minahan.
Photo Courtesy: Discovery alert
