Gipahibalo sa Department of Health (DOH) nga walay natala nga kaso sa Ebola sa Pilipinas taliwala sa pagkuyanap niini sa ubang nasod sama sa Democratic Republic of the Congo ug Uganda. Giklaro sa DOH nga nagpabilin nga ubos ang risgo sa Pilipinas tungod kay layo ang nasod ug wala pay local transmission sa maong sakit. Dugang usab sa ahensya nga dili kini angay ikabalaka sa publiko.
Gipatin-aw sa DOH nga walay gi-irekomendar nga travel ban ang World Health Organization (WHO) batok sa mga apektadong nasod. Gihimo sa Bureau of Quarantine ang mas istriktong screening sa mga biyahero nga gikan sa Democratic Republic of the Congo ug Uganda aron masiguro nga walay makasulod nga posibleng natakdan sa Ebola.
Gipadayag usab sa DOH nga ang Ebola dili parehas sa COVID-19 tungod dili kini mutakod pinaagi sa hangin, kundili mokatag pinaagi sa body fluids. Ang mga sintomas sa Ebola mao ang hilanat, sakit sa ulo ug lawas, sunod-sunod nga kalibanga, ug pagsuka. Gipasabot usab nga taas ang death rate niini nga moabot og 40 hangtod 50 porsyento ug wala pay bakuna o tambal para sa Bundibugyo strain nga klase sa Ebola.
Gisugyot sa DOH nga padayong bantayan sa WHO ang sitwasyon samtang naa pay mga 700 ka suspected cases nga naitala.
Photo Courtesy: Assistance.ph
